Studentja Melisa Ibrahimi shpërblehet me çmimin e parë në garën ndërkombëtare për piano në Rusi
Melisa Ibrahimi, studente në Programin Piano të Fakultetit të Arteve të Universitetit të Prishtinës “Hasan Prishtina”, nё klasën e prof. Alberta Tronit, ka mbyllur këtë vit duke u shpërblyer me çmimin e pare në garën ndërkombëtare “International Music Competition Moscow”, në Rusi.

Për suksesin e saj, ajo falënderon në veçanti profesoreshën e saj, Alberta Tronin.
“Ishte një emocion i veçantë të zgjidhëm fituese e vendit të I-rë në garën “International Music Competition Moscow”, garë e nivelit internacional me konkurrentë nga e gjithë bota. Një vit i jashtëzakonshëm me suksese e me shumë punë së bashku me profesoreshën time Alberta Troni”, u shpreh studentja.

E lumtur për suksesin e Melisës shprehet edhe vetë profesoresha Troni, e cila tha që Melisen e presin edhe shume fitore në të ardhmen, falë talentit dhe punës së saj të palodhshme.
Melisa me talentin dhe punën e saj të palodhshme po vulos hapat në rrugën e formësimit të një pianisteje të shkëlqyer. Këtë vit është shpërblyer me çmime në garat internacionale në Beograd dhe Bonn, si dhe tani mori vendin e parë në garat në Moskë, në mesin e një konkurrence shumë të madhe botërore” theksoi profesoresha Troni.

Studentja Melisa Ibrahimi në muajin nëntor të këtij viti u shpërblye me çmimin e parë në kategorinë ‘Senior’ në garën e pianos në ‘Grand Prize Virtuoso 2020’ të mbajtur në Bonn të Gjermanisë, si dhe gjatë këtij viti ajo fitoi edhe çmimin e dyte në garat ndërkombëtare “International Music Competition”, nё Beograd, Serbi.